விவசாய சுதந்திரம்...! (Independence for Farmers)

விவசாய சுதந்திரம்...!

வீடு வீடா கடனை பெற்று

வித்து வாங்கி உழுது போட்டேன்...

பருவம் பார்த்து விதைத்ததாலோ - நான்

விதைச்ச பலன் விளைஞ்சு நின்னு...!

காற்றுக்கொரு சேதிசொன்னேன் – எனை

கடனாளியாக்காம கடந்துபோ...

மழைக்கொரு சேதி சொன்னேன் – என்

மண்ணை வாடாம பார்த்துக்கோ...

நிலத்துக்கொரு சேதிச்சொன்னேன் - என்

வயிறு காயாம வளர்ந்துக்கோ... - எல்லாம்

ஒன்றாய் பதில் சொன்னது

உனக்காகத்தான் நாங்கள் என்று..!

விட்டகுறை தொட்டகுறையாய்

நல்ல மகசூல் பார்த்து நிக்க...

முந்தி விரித்து நின்றானே – என்

முழுநாள் உழைப்பை முக்கால் விலைபேசி...

விளைச்சலும் வாடிப்போகாம - என்

வயிறும் காஞ்சும் போகாம...

கேட்ட விலைக்கு அள்ளிக்கொடுத்தேன் - இன்று

கேட்க நாதியின்று நிற்கின்றேன்...!

காற்றும் மழையும் நிலமும் - என்

சேதி கேட்டது – எனை

மலடாக்காமல் வளரவைத்தது...

மனிதனும் பிரிவினையும் – எனை

கூறு போட்டது – பொதுவான

இயற்கையைக்கூட தரமறுக்குது...!

நீரை, வேலிவைத்து பேரம் பேசுகின்றனர்

பச்சை நிலத்தின் பசிபோக்க...

காட்டாற்றையும் கட்டிப்போடுகின்றனர்

மனிதத்தின் கருணை வற்றிப்போக...

கடன் தோறும் அள்ளிகொடுக்கின்றனர்

விளைநிலத்தை வீட்டு மனையாக்க...

விளையா விதையில் மாற்றை புகுத்துகின்றனர் – எங்கள்

உழைப்பெல்லாம் விஷமாய் மாற்ற...!

பிச்சைப்பாத்திரம் ஏந்தி நிற்கிறேன் – என்னை

வாழவைக்கும் மண்ணுக்கு உயிர்கொடுங்கள்...

வளர்ச்சி மட்டும் நோக்காதீர்கள் – என்

நிலத்தை வெட்டி கூறுபோடாதீர்கள்...

இயற்கையை என்னைப்போல் நேசியுங்கள்

நிம்மதியாய் எங்களை வாழவிடுங்கள்..

விளைச்சலை மட்டும் பார்க்காதீர்கள் – எங்கள்

வியர்வைக்கும் பதில் சொல்லுங்கள்...

இயற்கைகளை சொந்தம் கொண்டாடாமல்

விவசாய சுதந்திரம் அளியுங்கள்...

விவாசாய நிலங்களை பாதுகாருங்கள்...!

.

.

-ஜோ. பிரிட்டோ ராஜ்